#上海 #外灘茂悅大酒店 #無敵大浦東風景 #天台酒吧先係重點 #Hyattonthebund #Shanghai
啱啱過去嘅農曆新年，買到國泰 Fanfare 嘅上海機票連酒店套票，就快閃左轉三日兩夜嘅上海之旅。國泰套票包嘅住宿，就揀左喺北外灘嘅茂悅大酒店，係 HYATT 酒店入面屬於 GRAND HYATT 的級數。酒店嘅位置雖然叫做係外灘附近，但距離地鐵站係有啲距離，最近嘅係12號線嘅國際客運中心站，要行十五分鐘左右。（不過，住得 HYATT 嘅其他客人通常應該都係搭的士？？？筆者除外啦）。所以筆者係到住嘅幾日，搭得最多嘅係巴士，酒店後面嘅大名路上有《白渡橋》巴士站，搭一兩個站就可以到外灘、南京東路、大世界嘅旺區，懶行路嘅可以多多搭巴士，再轉地鐵去遠啲嘅地方。
酒店分東西兩座樓，今次入住嘅係西座高層嘅雙床房，房間採取開於式設計，浴室同睡床無分隔，相當特別，不過酒店都準備左趟門，接受唔到浴室咁開放嘅朋友可以自己趟返埋佢。整體嚟講，房間相當寬敞闊落，不單只將幾個喼放平打開無問題，開枱麻雀打返幾圈都夠位（首先，你要有一幅麻雀同一張麻雀枱⋯⋯）。
筆者Check-in 嘅時候被前台邀請過加每晚400蚊人仔入住望更靚景嘅房，不過筆者拒絕左，最後呢間房係正面向住東座，但係側側地係望到晒浦東高樓大廈嘅靚景。不過講到靚景，就一定要上西座頂層嘅 VUE BAR 上面睇，外來客人要收過百蚊嘅入場費，但係住客係可以嘟房咭免費入場，係頂層嘅酒吧，可以一次過睇晒浦東嘅高樓大廈同外灘嘅夜景。住得係到嘅，一定一定要上酒吧睇下個景先值回房價。
