#氷見 #冰見 #溫泉酒店 #一泊二食 #絕景溫泉 #無敵大海景 #立山連峰 #日本海 #海灯 #うみあかり #umiakari #軟雪糕任食

一向鍾意浸溫泉嘅筆者，今次嚟到富山縣嘅冰見，就揀左呢一間叫「うみあかり」嘅溫泉酒店，雖然酒店大門標住漢字「海灯」嘅招牌，不過無論係酒店官網還是筆者所用嘅日本訂房網都係用平假名嘅名。有興趣訂房嘅朋友喺訂房搜尋嘅時候就要留意返啦。

咁呢間酒店究竟有咩咁特別呢？筆者覺得最正嘅就係佢個海景溫泉。呢間酒店係網上嘅一啲日本 n 處絕景露天溫泉嘅文章上榜上有名。佢特別之處在於有個無敵大海景之餘，位處富山灣西側嘅海灯係可以係海景背後見到立山連峰，呈現海中有山之絕景。個景，真係靚嘅，筆者到訪果日啱啱好夠好天，春末初夏之際山上仍有殘雪，配出嚟嘅畫面係正嘅。佢個露天溫泉就係一邊望住呢個靚景，一邊浸。

話說大堂有部軟雪糕機，check in後直至夜晚可以任食，隔離仲有 illy 咖啡機任飲。

嚟到咁靚景嘅地方，當然要俾貴少少住返間海景房。筆者今次入住嘅就係星之棟海側和室，望嘅係同個溫泉一樣嘅無敵大海景。揀海側和室仲有一個重要原因，就係間房係背西向東，較準鬧鐘起身可以（天氣許可嘅話）睇住個太陽徐徐咁係日本海上浮上嚟。

房間嘅冷氣同電視機明顯係近年嘅產物，而餐廳都係最近重新裝修好，不過酒店內部同房間某D位置明顯睇得出呢間係一間歷史悠久、年代久遠嘅酒店。筆者就完全唔介意嘅，不過唔鍾意舊酒店嘅人就可能要留意吓啦。

下一頁續→→→
冰見絕景溫泉酒店 うみあかり(海灯) 宿泊記 夕食篇